तुलसीपुर । लुम्बिनी प्रदेशमा नयाँ सरकार गठनका लागि गठबन्धनले प्रदेश प्रमुख अमिक शेरचनसमक्ष दाबी प्रस्तुत गरेको छ । कांग्रेस, माओवादी केन्द्र, जसपा, जनमोर्चासहितको गठबन्धनले बिहीबार बिहान दाबी पेश गरेको हो । गठबन्धनले मुख्यमन्त्रीमा माओवादी केन्द्रका संसदीय दलका नेता कुलप्रसाद केसीलाई प्रस्ताव गरेको छ । चारवटै दलका संसदीय दलका नेता, दलको निर्णय र सिफारिस बुझाइएको छ ।

मुख्यमन्त्री शंकर पोखरेलको राजीनामापछि प्रदेशसभाको विशेष अधिवेशन अन्त्य गर्दै प्रदेश प्रमुख शेरचनले नयाँ सरकार गठनका लागि आह्वान गरेका थिए । लुम्बिनीमा कांग्रेसका १६, माओवादी केन्द्रका १४, जसपाका तीन र राष्ट्रिय जनमोर्चाका एक सांसद छन् । गठबन्धनमा हृदयेश त्रिपाठी समूहमा रहेका सांसद अजय शाही पनि सामेल भएका छन् । र, नयाँ सरकारका लागि ४२ सांसदको बहुमत जुटेको छ । केसीले बिहीबार नै मुख्यमन्त्रीको शपथ ग्रहण गर्नेछन् । त्यससँगै चारजनाको मन्त्रिमण्डलले सपथ ग्रहण गर्ने योजना रहेको गठबन्धनले जनाएको छ ।