तुलसीपुर । तुलसीपुर खानेपानी उपभोक्ता तथा सरसफाई संस्थाको निर्वाचन कार्यतालिका सार्वजनिक गरिएको छ । संस्थाको निर्वाचन समितिले सार्वजनिक गरेको कार्यतालिका अनुसार आउदो पौष १७ गते निर्वाचन हुने भएको छ । संस्थाको नयाँ नेतृत्व चयन गर्नका लागी आउदो पौषमा निर्वाचन हुने भएको हो ।

सोहि अनुरुप शुक्रवार मतदाताहरुको नामावली प्रकाशन, मंसीर २७ गते दिउँसो तिन बजे सम्म मतदाता नामावली उपर दावी विरोध गर्न सकिने निर्वाचन समितिले जनाएको छ । यस्तैगरी मतदाता नामावलीको अन्तिम प्रकाशन सोहि दिन बेलुका पाँच बजे सम्म हुने भएको छ ।

निर्वाचन समितिका अनुसार आउदो पौष ११ गते दश बजेदेखी दिउँसो तिन बजे सम्म उम्मेदवारहरुको मनोनयन पत्र दर्ता गर्ने र बेलुका पाँच बजेसम्म उम्मेदवारी नामावली प्रकाशन, पौष १२ गते ११ बजे सम्म उम्मेदवारको नामावली उपर दावी विरोध , सोहि दिन चार बजे उमेदवारहरुको संसोधिन नामावली प्रकाशन, पौष १४ गते ११ बजेसम्म उम्मेदवारहरुको नामावली फिर्ता लिन सकिने र बेलुका पाँच बजे सम्म उम्मेदवारहरुको अन्तिम नामावली प्रकाशन गरिने छ ।

यस्तैगरी पौष १५ गते दिउँसो १२ बजे सम्म उम्मेदवारहरुलाई चुनाव चिन्ह प्रदान गरिने, पौष १७ गते विहान साढे सात बजेदेखी बेलुका साढे चार बजे सम्म मतदान हुने निर्वाचन समितिले जनाएको छ । मतदान स्थल भने तोकिएको छैन । मतदान सम्पन्न भए लगतै मतगणना सुरु हुने समितिले जनाएको छ ।।