तुलसीपुर । वैदेशिक रोजगारीको सिलसिलामा मलेसिया गएका तुलसीपुर उपमहानगरपालिका-११ बेलगनारका रुपलाल चौधरी (लालु) को  निधन भएको छ। चार वर्षअघि मलेसिया गएका चौधरी आज नेपाल फर्कने क्रममा क्वालालम्पुर एअरपोर्टमा मृत्यु भएको पारिवारिक स्रोतले जनाएको छ। बेलगनारका घनश्याम चौधरीका अनुसार एअरपोर्टमा बसिरहेको बेला अचानक लडेको खबर आएको थियो । उनलाई एअरपोर्टमै मृत घोषणा गरिएको थियो ।

चौधरी नेपाल फर्कनका लागि बोर्डिङ पास लिएर प्रतीक्षारत अवस्थामा थिए । घर आउन लागेको भन्दै खसी बनेका चौधरी परीवार मृत्युको खबर सुन्दा शोकमा डुबेका छन् । परिवारका सदस्यलाई चौधरीको मृत्यु हृदयघातबाट भएको जानकारी प्राप्त भएको छ । मृतक चौधरीको शव नेपाल ल्याउने प्रक्रिया अघि बढाईदिन परीवारको आग्रह छ ।