ओमप्रकाश गुप्ता, सिसहनियाँ ६ जेठ ।

दाङको एक सामुदायिक वनले राहत बाँड्न लगेको चामल कुहिएको धुलैधुलो भएको फेला परेको छ । वनले बाँडन लगेको चामल कुहिएको खान नमिल्ने भएपछि उपभोक्ताले फिर्ता गरेका छन् । राजपुर गाउँपालिकामा वडा नम्बर ७ बनकट्टीका स्थानीयलाई राहत वितरण गर्नको लागि लगिएको चामल गुणस्तरहिन भएको भन्दै फिर्ता लिइएको हो । लमहीको आर.के.सप्लायर्सले विक्री गरेको पहुेँलो बोरामा चन्दन लेखिएको चामल गुणस्तरहिन भेटिएको हो ।

उक्त सप्लायर्सबाट राजपुर ७ को भयरथान सामुदायिक वनले आफ्ना उपभोत्तालाई राहत वितरण गर्नको लागि १६४ बोरा चामल लगेकोमा १३२ बोरा चामल कुहीएको, मक्कीएको अवस्थामा फेला पारेपछि फिर्ता गर्नको लागि लमही ल्याइएको सामुदायिक वनका अध्यक्ष चेतबहादुर ओलीले जानकारी दिएका छन् । विक्रेताले सेम्बल देखाउँदा सेतो बोराबाट देखाएको विक्री गर्दा आफुहरुलाई सेतोसंगै पहेँलो बोरीमा चन्दन जातको चामल पनि मिसाएर दिएको उनले बताए । एक हजार एकसय २५ रुपैयाँ प्रति बोरा मुल्य परेको उक्त चामल देख्दा कालो सडेको र धुलैधुलो देखिन्छ । अहिले उक्त सप्लायर्सको चन्दन जातको चामल राखीएको गोदाम सिल गरिएको थप अनुसन्धान पश्चात सम्बन्धित निकायले कारवाही गर्ने देउखुरी उद्योग बाणिज्य संघका अध्यक्ष रत्नप्रसाद श्रेष्ठले जानकारी दिए ।

चामल फिर्ता गराउन र आउन जाने दुवानी क्षेतीपुर्ती स्वरुप उपलव्ध गराउन सप्लायर्सको प्रोपाइटर सहमभत भएका छन् । प्रोपाइटर आनन्द गुप्ता र इन्द्रमणि खनालले चामल आफुहरुले नहेरेको कारण समस्या भएको बताएका छन् । विरगंजबाट आएको आर्यात गरिएको उक्त चामल आफुले अबदेखि बिक्री नगर्ने भन्दै उपभोक्तालाई क्षेतीपुर्ती उपलव्ध गराउन प्रापाइटर राजी भएका भएका हुन् । आरके सप्लायर्स खनाल किराना पसलका प्रोपाइटर इन्द्रमणि खनाल र आनन्द गुप्ताको साझेदारीमा संचालनमा छ । अहिले उक्त सप्लायर्समा रहेको ४२ बोरा चामल र फिर्ता आएको एकसय ४२ बोरा गरी एक सय ८४ बोरा चामल सहितको गोदामलाई सिल गरिएको छ ।

वडा प्रहरी कार्यालय,उद्योग बाणिज्य संघ,पत्रकारको रोहबरमा मुचुल्का उठाएर गोदाम सिल गरेर अनुसन्धान थालिएको वडा प्रहरी कार्यालय लमहीका प्रमुख प्रज्वल थपलियाले जानकारी दिएका छन् । अहिले बन्द गरेर अनुसन्धान थालिको र दोषी भेटिए कारवाही हुने उनले बताएका छन् ।