तुलसीपुर ,२८ जेठ ।

प्रहरीले रुकुम पश्चिमको सोती घटनामा संलग्न भएको भन्दै बुधबार भेरी नगरपालिका–४ का इन्द्रबहादुर मल्लसहित ३ जनालाई पक्राउ गरेको छ । प्रहरीले उनी सहित सोतीकै अर्का एक जनालाई बुधवार पक्राउ गरेको हो भने अर्का एक जनालाई मंगलवार पक्राउ गरेको बताएको छ ।
कल डिटेलका आधारमा पक्राउ परेका इन्द्रबहादुर सोती गाउँका मल्ल परिवारका आफन्त हुन् ।उनको परिवार लामो समयमा भेरी नगरपालिका ४, गैरीखालीमा बसोबास गर्दै आएको छ ।गत १० गते घटना हुनुअघि नवराजहरूको समूह केटी भगाउन आएको भनी इन्द्रबहादुरले फोनमार्फत सोती गाउँका मल्ल परिवारलाई सुराकी गरेको पीडित परिवारले आरोप लगाएको छ ।

इन्द्रबहादुरलाई पक्राउ गरी जिल्ला प्रहरी कार्यालय पश्चिम रुकुम पठाइएको जाजरकोट प्रहरीप्रमुख किशोरकुमार श्रेष्ठले बताए । त्यस्तै प्रहरीले घटनामा संलग्न भएको आरोपमा रुकुम पश्चिम चौरजहारी नगरपालिका वडा नम्वर ८ का सविन पुन पनि पक्राउ परेका छन् । उनलाई मंगलवार पक्राउ गरी अनुसन्धान सुरु गरिएको रुकुम पश्चिमका प्रहरी प्रमुख ठग बहादुर केसीले बताएका छन् ।

नवराज विक सहित ६ जनाको ज्यान जाने गरी भएको घटनामा संलग्न भएको आरोपमा यस अघि वडा अध्यक्ष सहित २५ जना पक्राउ परीसकेका छन् ।