काठमाडौं । विश्व जलवायु सम्मेलनमा सहभागी हुने क्रममा लण्डन पुगेका प्रधानमन्त्री शेरबहादुर देउवा र भारतीय प्रधानमन्त्री नरेन्द्र मोदीबीच सोमबार अपरान्ह भेटवार्ता हुने तय भएको छ। साइडलाइन भेटवार्ता २० मिनेटका लागि तय भएको छ। पछिल्लोपटक प्रधानमन्त्री भएपछि देउवा र मोदीबीच हुन लागेको यो पहिलो भेटवार्ता हो।

स्कटल्याण्डको ग्लास्गो शहरमा दुई प्रधानमन्त्रीबीच स्थानीय समयअनुसार सोमबार विहान १०ः४० देखि ११ बजे (नेपाली समयअनुसार अपरान्ह ३ः२५ देखि ३ः४५) भेटवार्ता हुने तय भएको कूटनीतिक स्रोतले जनाएको छ। ग्लास्गोको मर हल होटलमा भेटवार्ता हुने छ। अनौपचारिक प्रकारको भेटवार्तामा प्रधानमन्त्री देउवाको भविष्यमा हुने भारत भ्रमणका विषयमा छलफल हुन सक्ने कूटनीतिक अधिकारीहरुको आंकलन छ।