दाङ। जिल्लामा अहिलेसम्म ४६ जना डेंगुका संक्रमित फेला परेका छन्। स्वास्थ्य कार्यालय दाङका फोकल पर्सन कमल चन्दका अनुसार हाल जिल्लाभर करिब ४६ जनामा डेंगु संक्रमण देखिएको छ ।  सबैभन्दा बढी घोराही र तुलसीपुरमा देखिएको छ। अहिलेसम्म डेंगु संक्रमण भएका व्यक्तिहरूको अवस्था सामान्य रहेको भन्दै उनले यसबाट बच्न जिल्लाका सबै पालिकामा सचेतनामूलक कार्यक्रम भइरहेको समेत बताए। पालिकाहरू र नेपाल रेडक्रस सोसाइटीबाट विभिन्न सचेतनामूलक कार्यक्रम भइरहेको उनको भनाइ छ।

यसैगरी देउखुरीको राप्ती गाउँपालिका-१ भालुवाङबाट ‘लामखुट्टेको वासस्थान खोज र नष्ट गर’ अभियान सुरु गरिएको छ। शुक्रबारदेखि उक्त अभियान सुरु गरिएको हो। पहिलो चरणमा बजार क्षेत्रमा उक्त अभियान सुरु गरिएको गाउँपालिका स्वास्थ्य शाखा प्रमुख नारायण राउतले बताए । उनका अनुसार पानी परेसँगै जम्मा हुने ठाउँमा लामखुट्टेका लार्भा बढ्ने भएकाले डेंगुको जोखिम हुने भएकाले यो अभियान सुरु गरिएको हो। गाउँपालिकामा हालसम्म डेँगुका २ जना बिरामी भेटिएका छन् ।