तुलसीपुर । दाङको तुलसीपुरस्थित गुम्ह्राचोक नजिकै दुई मोटरसाइकल आपसमा ठोक्किँदा घाइते भएका एक जनाको उपचारका क्रममा मृत्यु भएको छ ।  मृत्यु हुनेमा तुलसीपुर उपमहानगरपालिका–१४ ड्वाँङपुरका ३३ वर्षीय कमलेश चौधरी रहेको इलाका प्रहरी कार्यालय तुलसपीपुरका प्रमुख होमबहादुर पराजुलीले बताउनुभयो । दुर्घटनामा गम्भीर घाइते भएका चौधरीको बाँकेको नेपालगञ्जस्थित न्युरो हस्पिटलमा उपचारका क्रममा दिउँसो पौने ४ बजे मृत्यु भएको हो ।

दुर्घटनामा तुलसीपुर–६ का ३० वर्षीय बसन्त बस्नेत र उनका २५ वर्षीय भाइ विवेक बस्नेत घाइते भएका छन् । सहोदर दाजुभाइ दुवै जना शिक्षक रहेको प्रहरीले बताएको छ ।

प्रहरीका अनुसार शुक्रबार बिहान  १० बजेतिर दाजुभाइ सवार लुप्र ०२–००१ प ११४७ नम्बरको मोटरसाइकल र मृतक चौधरी सवार रा ३ प ८८५५ नम्बरको मोटरसाइकलसँग आपसमा ठोक्किएको थियो।

यसअघि साउन २१ गते पनि त्यहि नजिकै  भएको सवारी दुर्घटनामा तुलसीपुर–११ कटाँहाकी २१ वर्षीया कल्पना केसी डाँगीको मृत्यु भएको थियो।