तुलसीपुर ।
देशका केही क्षेत्रमा पश्चिमी वायुको प्रभाव रहेकाले मौसम आंशिकदेखि सामान्य बदली भएको जल तथा मौसम पूर्वानुमान महाशाखाले जनाएको छ । अहिले बाग्मती प्रदेश र पश्चिमका प्रदेशहरुमा पश्चिमी वायुको प्रभाव रहेको मौसमविदले बताएका छन् । हाल सुदूरपश्चिम प्रदेश, कर्णाली प्रदेश, लुम्बिनी प्रदेश, गण्डकी प्रदेश र बाग्मती प्रदेशमा आंशिकदेखि सामान्य बदली भएको छ । केही स्थानमा वर्षा र हिमपात पनि भइरहेको मौसमविदले बताएका छन् ।

प्रदेश १ का पहाडी क्षेत्रमा आंशिक बदली हुनुका साथै बाँकी भू–भागमा मौसम सामान्यतया सफा रहेको छ । सोमबार दिउँसो देशभर आंशिकदेखि सामान्य बदली रहनेछ । सुदूरपश्चिम, कर्णाली, लुम्बिनी, गण्डकी र बागमती प्रदेशका केही स्थानमा मेघ गर्जन र चट्याङसहित हल्का वर्षाको सम्भावना छ । उता जुम्लामा भने हिमपात सुरु भएको सींञ्जा निवासी गजेन्द्र न्यौपानेले जानकारी दिएका छन ।